Монгол Улсын Засгийн газраас 2025 оны 11 сард багтаан батласан 2026 оны төсөвт Багш, эмч нарын цалинг нэмэгдүүлэн, эх үүсвэрийг нь суулгаж өгсөн. Үүнтэй уялдуулан 2026 оны 01 дүгээр сараас эхлэн нэмэгдсэн цалин нь шууд бодогдож орох ёстой. Гэвч зарим ажилчдын цалин нэмэгдэх бус хасагдаж орсон. Засгийн газар хэлсэндээ хүрч амласнаа биелүүлэхгүй байна хэмээн Монголын шинжлэх ухаан, Боловсролын ажилчдын байнгын хорооноос мэдэгдэл хийж, ажил хаялт зохион байгуулна гэдгээ илэрхийлээд буй. Уг асуудалд Боловсролын сайд П.НАРАНБАЯР дараах байр суурийг илэрхийллээ. Багшийн авч буй цалингийн бүтцийг зохистой болгож, үндсэн цалинг 70 хувьд хүргэн, нэмэгдлийг 30 хувьд багтаах бодлого барьж буй. Үндсэн цалин нь амьдралын баталгаа болох ёстой.