Монгол төрийн бэлгэ тэмдэг болсон Төрийн далбаандаа хүндэтгэлтэй хандах, төрт ёс, түүхэн уламжлалаа нандигнан өвлөх, үндэсний эв нэгдлийг бэхжүүлэх зорилгоор олон улс орны жишгээр “Төрийн далбааны өдөр”-тэй болох хуулийн нэмэлтийг миний бие анх санаачлан УИХ-ын гишүүн С.Бямбацогт, Н.Батбаяр, Ц.Дашдорж, Д.Дамба-Очир нарын хамт 2009 онд УИХ-д өргөн барин батлуулж байсан юм.

Тэр жилээс хойш буюу 2009 оноос хойш Монгол төр жил бүрийн 07 дугаар сарын 10 цэргийн жагсаалын ёслол дунд, Ерөнхийлөгчийн ивээл доор төр засгийн удирдлагууд, гадна дотно хүндэт зочдыг урьж ЁСЛОЛ ТӨГӨЛДӨР МАНДУУЛДАГ болоод байна.

Монгол Улсын ТӨРИЙН ДАЛБАА бол Даян дэлхийд МОНГОЛ УЛС гэсэн тусгаар тогтнол, бүрэн эрхт, аюулгүй байдлыг хамгийн товчоор илэрхийлдэг гүн утгатай тухайн улсын илэрхийлэл юм.