Сонгинохайрхан дүүргийн иргэдийн Төлөөлөгчдийн Хурлын дарга бөгөөд Гэмт хэргээс урьдчилан сэргийлэх ажлыг зохицуулах салбар зөвлөлийн дарга Б.Золбоо өнөөдөр /2025.04.16/ цагдаагийн 1-р хэлтэст ажиллалаа. Тус хэлтэс нь дүүргийн 18 хороог хариуцан ажилладаг бөгөөд гэр хороолын 9, орон сууцны 8, алслагдсан 1 хорооны газар нутгийг хамран ажиллаж байна. Гэмт хэрэг, зөрчлийн хувьд 10.000 хүнд ногдох гэмт хэргийн тоогоороо сүүлийн байранд жагссан амжилттай ажиллаж буй юм.

Урин дулааны улирал ирсэнтэй холбоотойгоор орон гэргүй, тэнэмэл, архины хамааралтай хүмүүс гудамж, нийтийн эзэмшлийн газар, орц, хонгилд ихээр цуглаж оршин суугчдын амгалан тайван байдлыг алдагдуулж байгаад онцгой анхаарч ажиллах шаардлагатайг хурлын дарга анхаарууллаа. Тухайлбал Таван шар, Драгон орчмын хэв журам, гудамж талбайн нөхцөл байдалд тухайлсан арга хэмжээ авч ажиллах шаардлагтайг онцоллоо. Түүнчлэн гэмт хэрэг, зөрчил ихээр үйлдэгддэг зарим хороодод төлөвлөгөө гарган биечлэн ажиллаж, холбогдох албан тушаалтнуудын уялдаа холбоог хангах, урьдчилан сэргийлэх чиглэлээр тодорхой ажил зохион байгуулахаар шийдвэрлэлээ.