King's Cross бүс нь Лондоны түүхэн, тээвэр, аж үйлдвэрийн зангилааны төвд байрладаг бөгөөд өдгөө хотын хамгийн амжилттай дахин төлөвлөлтийн жишээнүүдийн нэг болжээ. 19-р зуунд бүс нь төмөр зам, агуулах, нүүрс, бараа бүтээгдэхүүний тээвэрлэлтээр төвлөрч, Лондоны эдийн засгийн гол хөдөлгөгч хүчний нэг байсан. 20-р зууны сүүлээр аж үйлдвэрийн үйл ажиллагаа буурч, эдийн засгийн идэвх сулран, зарим хэсэг нь ашиглагдахаа больсон тул бүс орон нутгийн хөгжилд саад болж байв.

1990-ээд оны дундуур Лондоны засаг захиргаа болон хувийн хөрөнгө оруулагчид King’s Cross-ийн дахин төлөвлөлтийг судалж эхэлсэн бөгөөд 2001 онд Argent компанийг хөгжүүлэгчээр сонгож, 2006 онд ерөнхий төлөвлөгөө батлагдав. Энэхүү masterplan-д хуучин түүхэн барилгуудыг хадгалах, шинэ орон сууц, оффис, худалдаа, олон нийтийн талбай, парк, гудамж бий болгох зэрэг гол зорилтууд тусгагдсан байв.

Барилгын дахин төлөвлөлт нь гол төлөвлөлтийн зарчмуудыг хэрэгжүүлсэн:

• Холимог хэрэглээ: Орон сууц, оффис, худалдаа, боловсрол, соёлын талбайг нэг дор уялдуулсан.

• Түүхэн барилгын сэргэлт: 19-р зууны агуулах, Granary Building зэрэг барилгуудыг шинэ зориулалтаар сэргээж, түүх, өвийг хадгалсан.

• Тээвэр ба холболт: King's Cross Station болон St Pancras International зэрэг зангилаануудыг шинэчилж, метро, олон улсын галт тэрэгний холболтыг сайжруулсан.

• Ногоон байгууламж ба нийтийн талбай: Granary Square, Regent’s Canal дагуух алхах зам, дугуйн зам, ногоон байгууламжууд нь амьдрах орчны чанарыг нэмэгдүүлсэн.

2000-аад оны эхнээс хойш King’s Cross бүсэд 1,700 гаруй орон сууц, 4.25 сая фут² оффис, 1 сая фут² худалдаа, үйлчилгээний талбай бий болж, олон улсын технологи, урлагийн байгууллагууд төвлөрсөн. Хуучин аж үйлдвэрийн барилгуудыг сэргээж ашигласнаар архитектурын өвийг хадгалах, орон нутгийн соёл, нийгмийн ашиг сонирхлыг хангах давхар ач холбогдолтой болсон.

King's Cross бүсийн барилга дахин төлөвлөлтийн үйл явц нь зөвхөн физик орчны шинэчлэл бус, олон талт сорилт, зохицуулалтын төвөгтэй асуудлуудыг даван туулах шаардлагатай байв. Юуны өмнө, түүхэн барилгуудыг сэргээн ашиглах явцад архитектурын өвийг хадгалах болон орчин үеийн хэрэглээнд нийцүүлэх хооронд нарийн тэнцвэрийг олох нь чухал сорилт болсон. Хуучин агуулах, үйлдвэрийн барилгуудыг бүрэн нураахын оронд тэдгээрийн бүтэц, хэв шинжийг хадгалан шинэ зориулалтаар ашиглах нь нэг талаас соёлын үнэ цэнийг хамгаалж, нөгөө талаас эдийн засгийн үр ашгийг нэмэгдүүлэх шийдэл болсон юм.

Нөгөөтэйгүүр, бүсийн тээврийн зангилаа болох King's Cross Station болон St Pancras International-ийг шинэчлэх, өргөтгөх явцад олон нийтийн урсгал, аюулгүй байдал, бизнесийн орчныг зэрэг хангах шаардлага үүссэн. Үүнтэй холбоотойгоор олон нийтэд зориулсан нээлттэй орон зай, худалдаа үйлчилгээний бүс, явган болон дугуйн замыг төлөвлөхөд хот байгуулалтын олон түвшний зохицуулалт, бодлогын уялдаа чухал үүрэг гүйцэтгэсэн. Иймд King’s Cross-ийн дахин төлөвлөлт нь зөвхөн барилгын шинэчлэл төдийгүй, нийгэм, эдийн засаг, дэд бүтцийн цогц шийдлийг шаардсан иж бүрэн хөгжлийн жишээ болж байна.

Энэхүү дахин төлөвлөлт нь Лондон хотын өргөн хүрээний хотын шинэчлэл, түүхийн хадгалалт, нийгмийн тэнцвэр-ийг нэгтгэсэн дэлхийн жишиг төсөл болсон гэж мэргэжилтнүүд үнэлдэг. King’s Cross нь одоо зөвхөн тээвэр, аж үйлдвэрийн төв бус, соёл, урлаг, бүтээлч инновацийн төв болж, хотын ирээдүйн хөгжлийг тодорхойлж байна.