ЗАСАГЛАЛ, ХУУЛЬ, ЭРХ ЗҮЙН ХОРООНЫ ТӨЛӨӨЛӨГЧИД ДҮҮРГИЙН ХАРЬЯА ХЭЛТСҮҮДИЙН ҮЙЛ АЖИЛЛАГААТАЙ ТАНИЛЦЛАА

Сонгинохайрхан дүүргийн иргэдийн Төлөөлөгчдийн Хурлын Засаглал, хууль эрх зүйн хорооны Төлөөлөгчид өнөөдөр /2025.06.12/ дүүргийн Онцгой байдлын хэлтэс, Статистикийн хэлтсүүдийн үйл ажиллагаатай танилцлаа. Статистикийн хэлтсийн хувьд сар, улирал, жилээр тооллого, судалгаа, мэдээллээ Үндэсний статистикийн хороонд дамжуулан ажиллаж байна. Мөн сар бүр зах худалдааны төвүүд, зочид буудал, рестораны үйл ажиллагаатай танилцан үнийн судалгаа хийдэг байна. Цаашлаад 5 жилд нэг удаа явагддаг “Салбар хоорондын тэнцэл” энэ жил таарч дүүргийн 120 аж ахуй нэгжийг статистикийн судалгаанд хамруулахаар тооцон бэлтгэл ажил 50 гаруй хувьтай явагдаж байгаа талаар хурлын хорооны Төлөөлөгчдөд танилцууллаа.

Харин Онцгой байдлын хэлтсийн хувьд үндсэн 3 чиглэл буюу урьдчилан сэргийлэх, авран хамгаалах, хяналт тавих гэсэн чиглэлүүдээр үйл ажиллагаагаа явуулж байна. Авран хамгаалах гал унтраах 11, 26, 29-р ангиуд сүүлийн таван жилд 2025 гал түймрийн дуудлага хүлээн авсан бол 1557 хүний амь насыг аварч, 33,8 тэрбум төгрөгийн эд хөрөнгийн хохирлоос сэргийлж ажиллажээ. Тус хорооны Төлөөлөгчдийн хувьд тухайн байгууллагын бүтэц, чиг үүрэг дотоод үйл ажиллагаатай танилцах, төрийн үйлчилгээний чанар, хүртээмж, тулгамдаж буй асуудлыг тодорхойлон шийдвэрлэх арга замын талаар санал солилцож ажиллалаа.