Туул-1 коллектор нь Улаанбаатар хотын бохир усны шугамын ачааллыг авах гол хэвтээ тэнхлэгийн шугам бөгөөд Гачуурт, Хужирбулан, Улиастай, Налайх, Амгалан, Шархад, Дамбадаржаа, Долоон буудал, Баянхошуу, Толгойт, Баянголын ам орчмын хорооллуудын бохир усыг төв цэвэрлэх байгууламжид хүргэхээр төлөвлөгдсөн.

Тус коллекторын ажил нь нийт 30,4 км үргэлжлэх бөгөөд дөрвөн хэсгээс бүрдэнэ. Эхний хэсэгт 8,9 км бохир усны шугам угсрах ёстойгоос 8,67 км шугамын угсралт хийгдсэн бол хоёрдугаар хэсэгт 7,1 км угсралтын ажил хийгдсэн байна. Харин гуравдугаар хэсэгт 6,8 км шугам угсрахаас 2,7 км-ийг өнөөдрийн байдлаар угсарсан бол дөрөвдүгээр хэсгийн 7,2 км бохир шугамын угсралтын ажил хараахан эхлээгүй байна.

Тус коллекторын ажилд Нийслэлийн Хөрөнгө Оруулалтын Газар захиалагчийн хяналт тавьж байгаа бөгөөд энэ үеэр газрын дарга М.Говьсайхан: Туул 1 коллекторын дөрөвдүгээр хэсгийн шинэчлэгдсэн зураг төсвийг яаралтай батлуулж, магадлуулах шаардлагатай байгааг онцоллоо.