“ТЭРБУМ МОД ЭКО КЛУБ”-ын үйл ажиллагааны зорилго нь Монгол Улсын Ерөнхийлөгч Ухнаагийн Хүрэлсүхийн санаачлан эхлүүлсэн уур амьсгалын өөрчлөлт, цөлжилтийн эсрэг бодит үр дүнтэй “Тэрбум мод” Үндэсний хөдөлгөөний үйл ажиллагаанд залуучуудынхаа манлайлал, идэвх оролцоог нэмэгдүүлэх, мод тарьж, ногоон байгууламжийг бүтээх, арчлан ургуулах, олон нийтэд экологийн боловсрол олгох юм.

Нээлтийн үйл ажиллагааны хүрээнд “Үндэсний цэцэрлэгт хүрээлэн”-гийн инженерүүдийн сургалтын баг “Мод тарьж, арчлан ургуулах тухай” цогц сургалтыг зохион байгуулж, Социал Демократ Монголын Залуучуудын Холбооны Удирдах зөвлөлийн гишүүд, Нийслэлийн тэргүүлэгчид хамрагдаж байна. Тус сургалтад клубийн гишүүдийг үе шаттайгаар хамруулахаар төлөвлөж байгаа. Тун удахгүй эхлэх хаврын Бүх нийтээр мод тарих өдрүүдэд Социал Демократ Монголын Залуучуудын Холбоо үүсэн байгуулагдсаны 25 жилийн ойг тохиолдуулан 25 000 модыг тарьж төгөл үүсгэх ажлыг эхлүүлнэ.