Форумыг зохиолч, яруу найрагч, Чингис хааны одонт Г.Мэнд-Ооёо санаачлан, Соёлын яам, Монголын зохиолчдын эвлэл, Соёл, яруу найргийн академи хамтран зохион байгуулж байна. Форумд Монголын зохиолч, яруу найрагчдаас гадна, Швед, Франц, БНХАУ, ОХУ, Бангладеш, Испани, Израил, БНСУ улсаас зохиолч, хэвлэн нийтлэлчид хүрэлцэн иржээ. Хүн төрөлхтний язгуур угсаа, соёл уламжлалын өв тээгчид энэ форумд оролцож байна

Форумын үеэр, Монголын уран зохиол, яруу найргаас гадаадад хэвлэгдсэн антологиудын танилцуулга, "Өнөө үе ба яруу найраг" хэлэлцүүлэг, дээрх улс орнуудтай уран зохиолын харилцан орчуулгын хамтын ажиллагаа, "Олон хэлний найрсал" яруу найргийн уншлага болно. Мөн 30 гаруй уран бүтээлийг харилцан орчуулж толилуулна. Үүнд Ардын уран зохиолч Д.Урианхай "Ганцаараа нисч буй шувуу", Ц.Бавуудорж "Гунигийн гэгээ", М.Амархүү "Бүрхүүл", Ш.Лхамноржмаа "Зун шиг амьдарна", Я.Баяраа "Багет" зэрэг уншигч олны дуртай олон шүлэг яруу найраг багтжээ. Монголын утга зохиолын сонгодог бүтээл "Тунгалаг тамир" романыг Франц хэл рүү, БНХАУ-ын холбогдох байгууллагатай санамж бичиг байгуулан хоёр орны сонгодог болон орчин үеийн шилдэг 100 бүтээлийг харилцан орчуулж, олон улсын зах зээлд гаргах ажлуудыг хийж байна