“Хорин минутын хот” концепци, түгжрэлийг бууруулж, төвлөрлийг сааруулах бодлогын хүрээнд төрийн цогц үйлчилгээг анхан шатны нэгжээс хүргэх зорилгоор дүүргийн 40 дүгээр хороонд цагдаа, өрхийн эмнэлэг, хорооны цогцолбор барилга ашиглалтад орж өнөөдөр нээлтээ хийлээ.

Тус барилгын нэгдүгээр давхарт нэг цэгийн үйлчилгээ, хоёр, гуравдугаар давхарт өрхийн эрүүл мэндийн төв, дөрөвдүгээр давхарт хэсгийн ахлагч нар, иргэний танхим, барилгын баруун талд цагдаа байрлаж тус хорооны 8700 иргэнд төрийн үйлчилгээг үзүүлэх юм.  

Мөн уг цогцолбор барилга нь цахилгаан шаттай,  төвийн дулааны шугамд холбогдсоноос гадна өөрийн эх үүсгэврээр халаалтаа давхар шийдсэн. Нийслэлийн төсвийн хөрөнгө оруулалтаар ашиглалтад орсон дээрх барилгын гүйцэтгэгчээр “Энэрэлт Их Эрдэнэ” ХХК ажиллаж байна.