Өмнөговь аймгийн боловсролын салбар нь 23 сургууль, 34 цэцэрлэг, Политехникийн коллеж, Технологийн дээд сургууль, Насан туршийн суралцахуйн төв, хувийн бага сургууль, нийт 61 сургалтын байгууллагаар 25300 гаруй суралцагчдад боловсролын үйлчилгээг хүргэхээр хичээлийн шинэ жилээ эхлүүлж байна.

Аймгийн боловсролын салбарын бодлогын хүрээнд сургууль, цэцэрлэгийн хүртээмжийг нэмэгдүүлэх, анги бүлэг дүүргэлтийг багасгах замаар багшийн ачааллыг бууруулах, багшийн мэргэжлийн тасралтгүй хөгжил, гадаад дотоодод туршлага судлах боломж нөхцөл, урамшуулал дэмжлэгээр нийгмийн баталгааг хангах бодлогыг барьж ажиллаж байна.

Аймаг, орон нутгийн төсвөөр 2 сургууль, 3 цэцэрлэг, 1 дотуур байрны барилга, 4 өргөтгөлийн барилга, 8 сургууль, цэцэрлэг, дотуур байранд их засварын ажлын хөрөнгө оруулалтыг хийж, 70 гаруй тэрбум төгрөгийг боловсролын салбартаа зарцуулж байна.