Өнөөдөр Монгол улсын Засгийн газар ээлжит хуралдаанаа хийж зарим нэгэн шийдвэрүүдийг гаргалаа. Үүний нэг нь Монгол улсын Ерөнхий сайд асан Л.Оюун-Эрдэнэ огцрох өдрөөсөө 4 хоногийн өмнө Засгийн газрынхаа хамгийн сүүлчийн хуралдааныхаа үеэр Монгол улсын хилийн бүсэд 34 мянган га газрыг ашиглах зөвшөөрөл олгосон нь Монгол улсын Үндсэн хууль, Үндэсний аюулгүй байдалд заналхийлсэн шийдвэр хэмээн ХЗДХ-ийн сайд Б.Энхбаяр мэдээллээ. Энэ асуудалтай холбоотойгоор Монгол улсын Ерөнхий сайд Г.Занданшатар энэхүү тогтоолыг дэмжиж, зөвшөөрөл олгосон албан тушаалтнуудад хуулийн хариуцлага тооцохыг шаардлаа.