Гэр бүл, хөдөлмөр, нийгмийн хамгааллын яамны Төрийн нарийн бичгийн дарга А.Даваажаргал НҮБ-ын Хүн Амын Сангийн суурин төлөөлөгч ноён Халид Шарифитай уулзлаа.

Монгол Улсын Засгийн газар, Гэр бүл, хөдөлмөр, нийгмийн хамгааллын яамтай нягт хамтран ажиллаж, хүн ам, гэр бүл, жендэрийн эрх тэгш байдал, залуучууд, эмэгтэйчүүдийн хөгжил, хамгааллын чиглэлээр бодлогын болон техникийн дэмжлэг үзүүлж үр дүнтэй хамтран ажиллаж ирсэн.

Уулзалтаар НҮБ-ын Хүн амын сантай тогтоосон үр дүнтэй түншлэлээ бэхжүүлж, хүн ам, гэр бүл, жендэрийн эрх тэгш байдлыг хангах чиглэлээр хамтын ажиллагааг өргөжүүлэх талаар санал солилцсон.

ГБХНХЯ-ны Төрийн нарийн бичгийн дарга А.Даваажаргал, “Монгол Улсад төрөлт, гэрлэлтийн түвшин буурч, гэр бүл цуцлалт өсөх хандлагатай байна. Насжилт нэмэгдэж, алслагдмал хөдөө орон нутаг дахь залуучуудын жендэрийн тэгш бус байдал зэрэг хүн ам зүйн хувьд олон чухал асуудал тулгамдаж байгааг дурдаад дараах чиглэлээр цаашид хамтын ажиллагаагаа өргөжүүлэх хүсэлтэй байгаагаа илэрхийлэв. Үүнд:

Гэр бүлийн тухай хууль болон Гэр бүлийн хөгжлийг дэмжих тухай хуулийн хэрэгжилт, дагалдах дүрэм журмыг боловсруулах, олон нийтэд сурталчлах; ахмад настны нийгмийн хамгааллыг сайжруулах чиглэлээр ажиллах,

Гэр бүл төлөвлөлт, нөхөн үржихүйн эрүүл мэндийн боловсролын хөтөлбөрүүдийг үнэлж, шинэчлэх;

Эмэгтэйчүүдийн эдийн засгийн оролцоо, асаргаа халамжийн ажлын үнэлгээг бодлогод тусгах чиглэлээр ажиллах;

Жендэрт суурилсан болон технологид суурилсан хүчирхийллээс урьдчилан сэргийлэх, хохирогч хамгааллын тогтолцоог бэхжүүлэх;

Хөдөөгийн болон малчин эмэгтэйчүүдийн хөгжил, нийгмийн хамгааллыг дэмжих чиглэлээр хамтарсан санаачилга хэрэгжүүлэх зэрэг болно.

Ноён Халид Шарифи, тус яамнаас дэвшүүлсэн бодлогын зорилтууд Хүн Амын сангийн тэргүүлэх чиглэлүүдтэй яв цав нийцэж байгаа тул бүрэн дэмжиж ажиллахаа илэрхийлсэн. Ялангуяа ГБХНХЯ-наас тавьсан хүсэлтийн дагуу Хүн ам зүйн хэтийн төлөв тодорхойлох судалгаа шинжилгээний ажлыг ҮСХ-той хамтран хийнэ. Зөвхөн тоо гаргаад орхих биш, бодлогын шийдэл тодорхойлж, зөвлөж ажиллахыг зорино гэлээ.