Монголын боловсролын салбарын бодит байдал гашуун хэвээр байна. 2025 оны статистикаар улсын сургуулийн багш нарын дундаж цалин 1.4–1.6 сая төгрөгийн хооронд хэлбэлзэж, энэ нь Улаанбаатар хотын амьжиргааны өртөгт хүрэхгүй байна. Зарим хөдөө, орон нутгийн сургуулиуд өвөлдөө дулаан хангамжийн доголдолтой, сурагчид хүйтэн ангид хичээллэдэг бол хичээлийн хэрэглэгдэхүүн нь 10–15 жилийн өмнөхөөс шинэчлэгдээгүй байна. Гэтэл энэ асуудлуудыг шийдэхийн оронд Боловсрол, шинжлэх ухааны яам 2025 оны төсвөөс 1 тэрбум 33 сая төгрөгийг хурлын зориулалтын сандал, ширээ худалдан авахад зарцуулсан баримт ил болов. Худалдан авалтын зар тендерийн сайтад нийтлэгдсэн бөгөөд нийлүүлэгчийн сонгон шалгаруулалт хоёрхон компанийн дунд явагдсан байна. Татвар төлөгчдийн мөнгөөр авсан эдгээр сандал, ширээ нь яамны хурлын танхимд ашиглагдах бөгөөд нэг ширээний өртөг дунджаар 15–20 сая төгрөг, нэг сандлын үнэ 2–3 сая төгрөг хүрч байгаа нь иргэдийн дургүйцлийг төрүүлжээ.

“Энэ мөнгөөр 50 орчим аймгийн сургуулийн анги танхимыг засварлах, 700 гаруй багшийн цалинг 1 сараар нэмэх боломж байлаа” Нийгмийн сүлжээнд “Багш нарын цалин, сурагчдын ном, сургалтын материалд мөнгө байхгүй гээд л байдаг. Харин дарга нарын хурлын сандалд бол тэрбумаар нь гаргадаг” гэх шүүмжлэл өрнөж, төрийн хөрөнгө зарцуулалтын ёс зүйг дахин эргэлзээнд оруулав. Сүүлийн 5 жилд боловсролын чанарын үнэлгээ Олон улсын PISA судалгаагаар буурсан ч, бодит сайжруулалт хийхийн оронд удирдлагын тав тухыг түрүүлж тавьсан нь салбарын бодлогын жинхэнэ нүүр царайг ил болголоо.