Уулзалтын эхэнд, Монгол Улсыг хариуцсан хамтын ажиллагааны газрын дарга Даниел Хачез уулзалтын бүрэлдэхүүнд ирсэн ажлын хэсгээ Дэд сайд Г.Түвдэндорж болон албаны бусад төлөөлөлд танилцуулаад, Монгол улс хилээ нээж, бид анхны зочид болсондоо баяртай байна гээд, талууд байгаль орчин, аялал жуулалчлал, “Тэрбум мод” үндэсний хөдөлгөөн, ойн аж ахуй чиглэлээр санал солилцов.

 

БОАЖ-ын Дэд сайд Г.Түвдэндорж хэлэхдээ, Европын Холбоо болон түүний гишүүн орнуудын хэрэгжүүлсэн төсөл, хөтөлбөр нь уур амьсгалын өөрчлөлтөд дасан зохицох, биологийн олон янз байдлыг хамгаалах, био аюулгүй байдал болон аюулгүй ажиллагааны аргачлал, шийдлийг нутагшуулах, боловсон хүчнийг бэлтгэх, гадаад хамтын ажиллагааг хөгжүүлэхэд бодитой хувь нэмэр оруулж ирсэнд талархаж буйгаа илэрхийлээд, хамтын ажиллагаа үргэлжүүлэх хүсэлтэй байгаа гэдгээ илэрхийллээ.

 

Түүнчлэн Европын Холбооны санхүүжилттэй хэрэгжсэн био-аюулгүй байдлыг хангах үндэсний эрх зүйн орчныг сайжруулах, био-аюулгүй ажиллагааны мэргэжлийн боловсон хүчний чадавхыг бэхжүүлэх, хими, биологийн хог хаягдлын менежментийг сайжруулах төслүүд цар тахлын үед био-аюулгүй ажиллагааг хангахад ихээхэн хувь нэмрээ оруулсныг онцолсон юм.

 

Үүнээс гадна Засгийн газрын 2020-2024 оны Үйл ажиллагааны хөтөлбөрт эдийн засгийн тэргүүлэх чиглэлээр тодорхойлсон аялал жуулчлалын салбарыг чанаржуулах, улмаар орон нутгийн иргэдийн амьжиргааг дээшлүүлэх, Ковид 19-ийн нөлөөг багасгах, даван туулах зэрэг асуудлууд БОАЖ-ын салбараас туссан. Хэрэгжилтийг хангах зорилгоор байгаль орчин хамгаалал, тогтвортой менежментийг хэрэгжүүлэх, аялал жуулчлалын салбарын үйл ажиллагааг эрчимжүүлэхэд анхааран ажиллаж байна гэж ярьсан юм.

 

Харин Европын комисс дахь олон улсын түншлэлийн ерөнхий газрын Ази хариуцсан захирал Жан-Луи Виль ярихдаа, өнгөрсөн хугацаанд бид олон чиглэлээр хамтран ажиллаж ирсэн. 2021-2027 он хүртэл хэрэгжих олон талт баримжаат хөтөлбөрийн хүрээнд эдийн засгийн олон хэмжигдэхүүнийг гарган тавьж байгааг дурдаад, Монгол Улсын Ерөнхийлөгчийн санаачилга “Тэрбум мод” үндэсний хөдөлгөөн нь байгаль орчин, ойн аж ахуйг хамгаалан хөгжүүлэх чиглэлийн хамгийн оновчтой санаачилга, шийдэл гэдгийг тэрээр тодотгосон юм.

Мөн “Тэрбум мод” санаачилга нь Европт төдийгүй Азидаа тэргүүлэх санаачилгаар нэрлэгдэж буйг дуулгалаа.

 

Талууд хамтын ажиллагаагаа өргөжүүлэн ойн хомсдол, газрын доройтол, хүлэмжийг хийг бууруулах, ойн аж ахуйг хөгжүүлэх чиглэлээр хамтран ажиллахаар санал нэгдсэн юм.

Уулзалтын төгсгөлд БОАЖ-ын Дэд сайд Г.Түвдэндорж Европын Холбоо болон түүний гишүүн орнуудтай ойн салбарын хамтын ажиллагааг эрчимжүүлэх чиглэлээр яриа хэлэлцээг үргэлжлүүлнэ. “Тэрбум мод” үндэсний хөдөлгөөнөөр зогсохгүй, ойн салбарыг эдийн засгийн эргэлтэд оруулах, ногоон ажлын байрыг бий болгох хүрээнд бүхий л боломжит арга хэлбэрээр хамтарч ажиллахад бэлэн байна гэв.