СЭВЭЛЗСЭН САЛХИ, СЭТГЭЛЭЭРЭЭ ДЭМЖСЭН ОЛОН, ЭНЕРГИ ШИНГЭСЭН САЙХАН УУЛЗАЛТ, АЛХАЛТ БОЛЛОО.

БЗД-ийн 19 дүгээр хороо, Цайз захаас хойш өгсөөд явахад нийтийн тээвэр байхгүйгээс хүмүүс 4-6 км алхахад хүрдэг. Хүрэн дэлгүүр хүртэл 500 төгрөгийн унаа явна. Гурван гудмаа дагаад өгсч урууддаг таксины үйлчилгээ бий. Нэг хэсэг нийтийн тээвэр явуулж эхэлсэн ч хоорондоо шугамаа булаацалдаад зогссоноос хойш 500-гийн унаа иргэдийн аминд нь орж байна. Гэхдээ хүн бүр 500 төгрөгийн унаанд суугаад байхгүй. Хүрэн дэлгүүрээс цааш унаа байхгүй бас л алхана. Өнөөдөр иргэдийн өдөр бүр хийдэг тэр алхалтыг гудамжаар хамтдаа ярилцангаа хийлээ. Дэнжээ өгссөөр овоон дээр ч гарлаа. Уул усандаа идээ, дээжээ өргөх гэж энэ хавийн улсууд овоо босгожээ. Сэвэлзсэн салхи, сэтгэлээрээ дэмжсэн олон, энерги шингэсэн сайхан уулзалт, алхалт боллоо.