Өнөө шөнө буюу есдүгээр сарын 23-24-нд шилжих шөнө Улаанбаатар хотод бороо, нойтон цас орно. Маргааш өдөр бага зэргийн бороо, нойтон цас орж,  салхи баруун өмнөөс баруун хойш эргэж секундэд 6-11 метр байхыг цаг уурын байгууллагаас мэдээллээ. 

Нойтон цас гэдэг нь агаарын температур 0о-аас бага зэрэг дулаан байх үед цас, бороо холилдон хайлмагтаж орох үзэгдэл юм.

Мөн Есдүгээр сарын 23-24-нд шилжих шөнө дараах нутгуудаар 0.0-12.0 мм цас орох юм байна. 

• Төв,
• Говьсүмбэрийн ихэнх сумд,
• Баян-Өлгий,
• Увс,
• Дорноговийн зарим сумд,
• Архангайн зүүн,
• Булган,
• Хэнтийн өмнөд,
• Өвөрхангай,
• Дундговь хойд,
• Сүхбаатарын баруун сумдын нутгаар цас орохыг цаг уурын байгууллагаас мэдээллээ. 

Есдүгээр сарын 24-ний өдөр Говьсүмбэр, Сүхбаатарын ихэнх сумд, Баян-Өлгий, Увс, Ховд, Завхан, Баянхонгор, Өвөрхангайн зарим сумд, Төв аймгийн зүүн, Хэнтийн өмнөд сумдын нутгаар 0.0-5.0 мм бороо орох юм байна. 

Монгол-Алтай, Хангай, Хэнтийн уулархаг нутгаар нойтон цас орох төлөвтэй байна. 

Салхи говь, тал, хээрийн нутгаар секундэд 12-14 метр хүрч ширүүснэ.

• Шөнөдөө Дархадын хотгор, Монгол-Алтай, Хангай, Хөвсгөлийн уулархаг нутаг, Завхан, Заг, Байдраг голын эх, Онон, Улз, Халх голын хөндийгөөр 0...-5 градус хүйтэн, говийн бүс нутгийн өмнөд хэсгээр +10...+15 градус, Их нууруудын хотгор, говийн бүс нутгийн хойд хэсгээр +5...+10 градус, бусад нутгаар 0...+5 градус дулаан,
• өдөртөө Монгол-Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Туул, Тэрэлж, Онон голын хөндийгөөр +7...+12 градус, говийн бүс нутгийн өмнөд хэсгээр +19...+24 градус, бусад нутгаар +13…+18 градус дулаан байна.