2024 оны сонгуулиар Монгол Улс анх удаа 126 гишүүнтэй парламентаа байгуулсан. Парламентын гишүүдийн тоог 76-аас 126 болгон нэмэгдүүлсний нэг үндэслэл нь төлөөлөх чадварыг нэмэгдүүлэх, нийгмийн олон талын дуу хоолойг хууль тогтоох байгууллагад хүргэх явдал байв. Өнөөдөр УИХ-д таван улс төрийн хүчний төлөөлөл сууж байна. 78 гишүүн тойргоос, 48 гишүүн намын жагсаалтаар сонгогдсон. Тооны хувьд төлөөлөл нэмэгдсэн. Харин иргэн төрдөө ойртсон уу? Өмнө нь нэг гишүүн олон мянган иргэнийг төлөөлж байна гэж шүүмжилдэг байв.

Гишүүдийн тоо нэмэгдсэнээр иргэдийн санал хүсэлт УИХ-д илүү хурдан хүрдэг, тойргийн асуудал илүү сайн сонсогддог болно гэсэн хүлээлт байсан. Хоёр жилийн дараа энэ өөрчлөлтийг иргэдийн өнцгөөс харах цаг болжээ. Та өөрийн УИХ-ын гишүүнтэйгээ өмнөхөөсөө илүү амархан холбогдож чаддаг болсон уу? Таны амьдарч буй хороо, сум, дүүрэгт тулгамдсан асуудлыг парламентын түвшинд хэн төлөөлж байгааг мэддэг үү? Сонгуулийн үеэр ирдэг улстөрч сонгуулийн дараа иргэдтэйгээ хэр тогтмол уулзаж байна вэ? Таны санал хууль, төсөв, төрийн бодлогод тусаж байгааг та мэдэрч байна уу? Энэ бол 126 гэдэг тооноос илүү чухал асуултууд.  Парламентын төлөөлөх чадварыг зөвхөн хэдэн нам, хэдэн эмэгтэй, хэдэн тойргийн төлөөлөлтэй болсноор хэмжих боломжгүй. Төлөөлөл гэдэг нь суудлын тоо биш. Иргэний дуу хоолой шийдвэрт хүрч байгаа эсэх юм. 126 гишүүнтэй парламент илүү олон хүний үзэл бодлыг багтаах бүтэцтэй болсон. Харин тэр боломж иргэн бүрт мэдрэгдэх бодит харилцаа, хариуцлага, шийдвэр болж чадсан эсэхийг одоо асуух хэрэгтэй.

Учир нь парламент томорсны эцсийн зорилго нь төрийг томруулах биш, иргэний төлөөллийг нэмэгдүүлэх явдал. 126 ТӨЛӨӨЛӨЛТЭЙ БОЛСНООР ИРГЭН ТӨРДӨӨ ИЛҮҮ ОЙРТСОН УУ? Хариултыг нь иргэд өөрсдөө өгөх цаг иржээ.