Дорнод аймгийн Халхгол сумын Цогтсүмбэр багийн “Бичигтийн-Өндөр” нэртэй газар, улсын хилээс 45 км зайд 2026 оны 10 дугаар сарын 08-ны өдрийн 11.50 цагт хээрийн түймэр гарч, Нөмрөгийн дархан цаазат газрыг хамран тархсан.

Уг түймрийг Дорнод, Сүхбаатар, Хэнтий, Дорноговь, Өмнөговь аймаг, Багануур дүүрэг дэх онцгой байдлын газар, Дорнод аймгийн Халх гол сум дахь гал түймэр унтраах, аврах 62 дугаар ангийн алба хаагчид, тус сумын удирдлага, ард иргэд, Нөмрөгийн дархан цаазат газрын хамгаалалтын захиргааны ажилтнууд, хилийн цэргийн 0198 дугаар ангийн хилчид, хил залгаа улсын онцгой байдлын бүрэлдэхүүн оролцсон нийт 60 бүлэг, 606 хүн, 100 нэгж техник хэрэгсэлтэй 10 дугаар сарын 08-13-ны өдрүүдэд ажиллаж, цурамд оруулсан.

Хилийн цэргийн 0198 дугаар ангийн захирагч, хурандаа Б.Гантөгс нь хилийн Сүмбэр боомтыг өндөр хурдны шилэн кабельд холбох арга хэмжээний нээлтэд оролцсон Хилийн боомтын захиргаа, Мобиком корпорацын удирдлага, орон нутгийн иргэд болох нийт 13 хүн (5 автомашин)-д 2026 оны 10 дугаар сарын 06-08-ны өдрүүдэд хилийн бүсэд нэвтрэх зөвшөөрлийг гаргасан хүсэлт болон холбогдох хуулийн заалтуудыг үндэслэж олгосон байна. Үүнд:

• Монгол Улсын хилийн тухай хуулийн 25 дугаар зүйлийн 25.2-д “Энэ хуулийн 26.2.3-т заасан зөвшөөрлийг улсын хилийн асуудал эрхэлсэн төрийн захиргааны байгууллагаас 1 жил хүртэл хугацаагаар, энэ хуулийн 30.2.3-т заасан зөвшөөрлийг тухайн орон нутагт байрлах хилийн цэргийн анги (салбар) 30 хүртэл хоногийн хугацаагаар олгож, хяналт тавина”
• Мөн зүйлийн 25.9-д “Улсын хилийн зурвас, бүс, боомтод нэвтрэх зөвшөөрөл нь эрх бүхий албан тушаалтны гарын үсэг, тэмдгээр баталгаажуулсан хэвлэмэл хуудас бүхий байна” гэж заасан.

Улсын Их Хурлын гишүүн У.Отгонбаяр, хилийн цэргийн 0198 дугаар ангийн захирагч хурандаа Б.Гантөгс нар 10 дугаар сарын 06-ны өдөр дээрх арга хэмжээний нээлтэд оролцоод Дорнод аймаг, Халх гол сум руу буцсан бөгөөд хээрийн түймэр гарах үед тухайн газар оронд байгаагүй болно.

Иймд цахим орчинд тархаад буй хээрийн түймэр гарахад эдгээр иргэдтэй хамт явсан, архидан согтуурсан, авлига авсан, зодолдсон, ан агнасан зэрэг нь бодит бус, ташаа мэдээлэл болохыг мэдэгдье.

Хилийн бүсэд нэвтэрсэн иргэдийн санамсар болгоомжгүй байдлын улмаас автомашинд гал гарч, хээрийн түймэр болон өргөжсөн бөгөөд гал гарсан шалтгаан нөхцөлийг тогтоох, түймрийн экологийн, эдийн засгийн хохирлыг тодорхойлох зорилгоор хууль хяналтын байгууллагууд албаны шалгалт явуулж байна.